Нөхөрлөлийн тухай яриа

Сарны доорхи уудам хорвоод өөөөө сайхан хүмүүс хичнээн олон юм бэээээ өөөөөөө санаа нийлсэн ганцхан чи минь өөөөөөөөөөө  саран доорхи наран юмуудааа өөөөөөөө...

Өөөө тэгэхээр санаа нийлсэн сайхан найзтай байх өөрөө сайхаан гэж. Найзаар минь намайг таньдаг учиртай, намайг хараад чамайг мэддэг сургаальтай... Тийм олон найз байхгүй ээ надад. Хамаг байдгаа бол цорын ганц "найз"-даа ярьдаг. Бусад нь эсэргээрээ надад бүхнээ нуулгүй ярина, би сонсоно чадлаараа зөвөлгөө өгнө, баяр гуниг, нууц бүхнийг нь бараг л хуваалцана.

Гэлээ гээд учиргүй хувийн асуудалд ороод эсвэл цааш дамжуулаад явахыг хүсдэггүй ээ. Янз янзын л асуудал урган гарах нь байна, зарим нь асуудлаа надад ярихаас ичнэ, миний өмнө "нэрээ хичээнэ"

Өөрөө бол бурханаас бэлэглэсэн ганц найздаа бүр хурааж байгаад л ярина даа. Бурханы бэлэг ч бас биш юм аа. Би өөрөө зориуд бүр шилж сонгож байж "олсым" түүнийгээ. 

Аав ээжид маань найз нөхөд олон юм шиг хирнээ их цөөн. Манайхан нэг тийм тайван намдуу, амгалан амьдралтай улс. Бусад шиг л өдөр шөнөгүй хамт яваад, ах дүүс болоод, өвөр түрийдээ ортлоо дотносож найзалдаггүй.

Ээж аавын найз гэхээр тоймтой юм санаанд орж ирдэггүй ээ. Ордог, гардаг, уулздаг найзууд мэдээж байгаа л даа гэвч хүсэн хүлээж, зорьж байж уулздаг амьдралын чухал утга учир болсон хүн ховор оо ховор. Бид ч аав ээжийнхээ энэ занг тодорхой хэмжээгээр өвлөөд авчихсан ерөнхийдөө нилээн биеэ даасан үзэл бодолтой, бусдаас төдийлөн хамаараад байдаггүй хүмүүс болж өссөн санагдана. Харжээ байхад манайхан найз нөхддөө чадах юм байвал заавал тусалдаг, найзуудаасаа учиргүй олон юм шаналгаж төвөг удаад байдаггүй, өөрийн найз нөхөд дундаа нэр хүндтэй нөлөөтэй юм шиг санагддагаа. 

Харин өдөр тутам хэлхэлдээд оров ч гарав ч хамт байж бие биенийхээ гэр орны ажилд туслах ч юм уу цугтаа гадуур тэнээд бие биенээ уруу татаад байдаг тийм найзтай хүн бол байхгүй ээ. Баяр ёслолоор ч юм уу манайхны хэн нэг нь найз нөхдөө дуудаж хоол унд хийхдээ туслуулж байснаа санахгүйм.

Миний найзууд л гэхэд миний хувийн амьдралыг бараг мэдэхгүй хэхэ. Дээр дурдсан амины ганц найзаас маань бусад нь хэзээ хэнтэй үерхээд юу яагаад юу болж төгссөн гэхчлэн гадарлахаас бус яг үнэн баримт, болсон процессыг дэс дараатай нь мэдэхгүй, би ч тоочиж ярьдаггүй.

Уулзаж ойр зуурын сонин хачнаа ярина, голдуу би тэдэндээ болсон болоогүй хамаагүй тэг ингэ гэхчлэн зөвөлгөө өгнө, янз бүрийн санаа оноо, санаачлага гаргана. Яриаг нь сонсоод болоод буй үйл явцын гол утга санааг нь тайлж хэлээд товч хэдий ч тодорхойгоор шийдэж ядаад байсан асуудалд нь хамгийн ашигтай хувилбарыг хэлж өгнө гэхчлэн хэхэ. Өөрийгөө магтаж байгаа юм биш л дээ. 

Гэхдээ манай найзууд ямар нэг юм болвол цаг хугацаа нь таараад уулзалдахаараа надтай зөвлөлдөнөө. Ухаан нь гадаад явмаар байна, тэр хүн тийм ийм санал тавилаа яах вэ би тэр урилгын нь дагуу явчих уу гэх ч юм уу. Найзууд маань бас намайг "муу санаатай" гэнээ хэхэ. Гэхдээ зөв "муу санаа" гэсээн энэ нь. Олон таалаас нь тийм ийм байна, ингэвэл яахым тэгвэл яах уу гэхчлэн хэрэгтэй гэж бодсон зүйлээ найзууддаа бол харамгүй хэлж өгнө шүү.

Хэн нэгэнтэй ярихдаа ямар нэг далд хар муу санаа агуулах, ашиг хайх, алаг үзэх үзэл манайханд хаа очиж байхгүй аливаа юманд үнэн сэтгэлээсээ хүнлэг, шударгаар ханддаг нь аав ээжийн минь хэдэн хүүхэддээ олгосон хүмүүжил. Тийм болоод ч тэр үү бусдыг, найз нөхдөө өөрсөд шигээ боддог байж магадгүй. Өө хайгаад энэ найз ийм, тэр найз тийм гэж ялгаварлан гадуурхах санаа суугаагүй нь найзуудад маань ч амар байдаг болов уу. 

Надад сүүлийн үеийн сонин хачнаа ярих гэж дотроо хадгалсаар байгаад зорин байж ирж ярьсан, салахдаа чамтай ингээд нууж хаах юмгүй тайван ярилцаад сэтгэл амраад гарах мөн ч сайхан шүү гэж хэлээд явсан найзаасаа улбаалан төрсөн бодлоо буулгасан нь энэ...