Emerald

Түүний тухай сүртэй дурсамж надад үгүй. Гэвч сэтгэлд цаанаа л дотнохон бүлээн дулаан санагддаг.

Царайлаг өндөр залуу инээмсгэлэн орж ирж, ширээний ардаас босч хаашаа ч юм дөхөж явсан миний өмнүүр өнгөрөхдөө хачин дулаахан харцаар харж инээмсгэлсэн хэвээр мэндлэхэд нь ямар сайхан нүдтэй залуу вэ гэж өөрийн эрхгүй дотроо дуу алдсан.

Хаанаас гэв гэнэт ороод ирэв, ямар учраас бидэнтэй нэгдэх болоо юм бол гэхчлэн сониучирхан бодож байснаа тод санаж байна.

Дараагийн өдрүүдэд түүнтэй арай илүү танилцаж испани хэлний орчуулагч болохыг нь мэдсэн.

Бидэнтэй нэгдсэн цөөхөн эрчүүдийн нэг, магадгүй хамгийн царайлаг, залуухан нь байсан болоод ч тэрүү охид бүгд түүнтэй ярилцахыг, ойр дотно мэдэж авахыг хүсдэг нь илэрхий байлаа.

Харин тэр ази охидод талтай байсан болоод ч тэр үү боломж гарах бүр дөхөж ирэн ярилцан санал бодлоо хуваалцсаар нэг мэдэхэд бид сайн найзууд болчихсон байж билээ. Бусад бүсгүйчүүд маань ч аль эрт анзаарчихсан жиг жуг гэцгээж байсан ч үнэндээ тэр тухайд бодохыг огт хүсээгүй ээ.

Цөөхөн хэд хоногт яг л миний хүсч явсан мэргэжлийг эзэмшснийг нь, хар багадаа эх орноо орхиж өөр нутагт суурьшсныг нь, ганц охин дүүтэйг нь, азиар аялахдаа соёл, ёс заншилд нь татагдсныг нь, дахин азиар аялахыг маш их хүсдэгийг нь ази охидыг сайхан гэж боддогийг нь гэх зэрэг олон зүйлийг мэддэг болсон. Харин тэр алиманд дуртайг минь мэддэг болж хааяа олон хүнээс онцолж ганц алим авчирснаараа дайлдаг байлаа.

Одоо бодоход царайлаг, залуухан эр хүн гэдгээс нь илүү түүний төрөлх соёл, угсаа гарал нь миний сонирхолыг татаад байжээ. Очиж үзэхсэн, соёлтой нь танилцахсан гэж боддог халуун цуст үндэстний тэр залууг хүүхэд байхдаа уншиж байсан Майн Ридийн зохиолуудын мустанг хөлөглөсөн омголон залуусын нэгнээр төсөөлдөг, одоо ч.

Emerald гэж гоё нэр шүү. Өнөөг хүртэл холбоотой байдаг ч тэр бүр захиа, зурвас бичилцэхээ больчихож дээ. Цаг хугацаа урсан өнгөрөхийн хэрээр амьдралын замаа хөөцгөөгөөд тэр байх даа.

Хааяахан гэв гэнэт санаанд орж Hola Amigo como estas?... A veces te echo de menos гэж хэлмээр ч юм шиг санагдахым...