Диваажингийн залуу...

Marco Leonardi гэдэг нэрийг манай үзэгчид төдийлөн сайн мэдэхгүй л болов уу.

Албан ёсны намрыг нь харвал тун ч товчхон бичигдсэн байдаг. 1971 онд Австралид Итали гаралтай гэр бүлд төрж, дөрвөн настайдаа Итали орондоо буцаж, тэндээ кинонд тоглож, түүний тоглосон кино нь Оскарын наадамд шилдэг гадаад киногоор шалгарч байсан гэсгээд түүний намтар өндөрлөнө.

Танил дүр төрх үү эсвэл????

Марцо Леонарди Америкийн Лос Анжелос хотод амьдардаг болоод нилээн удсан хэдий ч жилийн тэн хагасыг төрөлх Италидаа, тодруулбал Ром хотноо өнгөрүүлдэг гэнэ. 1986 оноос эхлэн кинонд дүр бүтээж, лавтай 20 илүү дэлгэцийн кинонд жүжиглэсэн гэхээр бас чамгүй сайн жүжигчин гэдэг нь харагдана.

Гэвч авъяаслаг хийгээд царайлаг өө хэлвэл ялимгүй намхан нуруутай энэ жүжигчин яагаад тэгтэл нэрд гараагүйг мэдэхгүй юм, магадгүй итали цустай учир англи хэлний бэрхшээлээс болж Холливүүдэд төдийлөн уригдаагүй юм уу гэж бодож болох ч түүний намтарт Англи, Итали, Португали, Испани хэлийг төгс эзэмшсэн гэж дурдсан байх юм билээ. Айхтар алдаршаагүй нь ч бас зарим талаар сайхан л санагддаг хэхэ.

Холливүүдийн алдарт одод болох Антонио Бандерас, Жонни Депп, Сальма Хайек, Уиллем Дефо, Микки Рурк, Ева Мендес, Дэнни Трехо нартай хамт тоглосон кино нь түүний гол дүрийг нь бүтээсэн бусад киноноос дутахгүй хүмүүсийн мэддэг бүтээл байж мэдэх юм.

Гол дүр биш бас эсрэг талын баатарт тоглосон байхаа. Би өөрөө энэ
киног нь олж үзээгүй ээ.

Анзаарсан бол дээрхи оддын нэрийг харахад Испани, Португали хэл цаашлаад Латин Америк санаанд орж байна уу? Ямар нэртэй кино гэж үү? "Эрт урдын цагт Мексикт нэг удаа" гэж махчлан орчуулах юм уу даа. "Once Upon a Time in Mexico" хэхэ.

Гэвч дээр дурдсан энэхүү "Once Upon a Time in Mexico" кино нь түүнийг алдаршуулсан юм биш. Америкийн үзэгчид бол түүнийг Like Water for Chocolate, (1992) киногоор нь нилээн сайн  мэддэг байх.

Like Water for Chocolate, (1992)
Marco Leonardi as Pedro Muzquiz

Харин манай үзэгчид Марцо Леонардиг гоолиг Елена бүсгүйд дурлаж шаналсан, Who said that? Gary Cooper? James Stewart? Henry Fonda? Eh? гэж дуу алдсан залуу Сальваторе Ди Витагийн дүрээр ихэнхи нь мэднэ.

Энэ кино нь Оскарын кино наадамд шилдэг гадаад киногоор шалгарсан дэлхийн сор бүтээлүүдийн нэг билээ.

Парадизо кино театр (Nuovo Cinema Paradiso) буюу миний өөрийн нэрлэдэгээр диваажингийн кино театрыг хэд үзсэн ч уйддаггүй. Анх үзчихээд хэд хоног биш бүр хэсэг хугацаанд сэтгэлээс гарахгүй, нэг тийм үгээр тодорхой хэлчихэж болохгүй гуниг ч юм шиг, сайхан дурсамж ч юм шиг эсвэл бүр хязгааргүй оргилсон хүсэл мөрөөдөл ч юм шиг бүхэл зүйл сэтгэлд зангираад байж билээ.

Ийм сайхан кинонд, тийм гайхалтай дүрд, тэгж сайхан жүжиглэсэн хүнд өөр юу хэрэгтэй гэж гэмээр. Олон кинонд тоглосон жүжигчдээс илүү үзэгчдийн сэтгэл зүрхэнд ганцхан дүрээр үүрд хоногшин үлддэг жүжигчин байх нь хавьгүй азтай байж ч мэдэх юм. Тиймээс энэ жүжигчнийг өдөр бүр, цаг минут бүр олны анхааралд өртдөг, алхаа гишгээ бүр нь алдартай сэтгүүлийн хуудсыг чимдэг одууд шиг болтлоо алдаршаагүйд дотроо битүүхэн баярладаг.

Марцо Леонарди Америкт бас Италид өөр бас олон улсад нилээн олон дүрд тоглосон байдаг. Ганц нэгийг нь дурдвал Le Buttane, (1994) The Stendhal Syndrome (1996), My Brother Jack (1998), The Five Senses (1999), From Dusk Till Dawn 3: The Hangman's Daughter, (2000) гэх мэтчилэн.

Үүрд залуухнаараа, үүрд сайхнаараа бас үүрд дурласан төрхөөрөө....

Жирийн кино сонирхогч, үзэгч миний хувьд бусад киног нь үзсэн ч тоглосон дүрийг нь төдийлөн онцолж харахыг хүсэхгүй л болов уу. Учир нь Сальваторе Ди Вита хэвээр нь төсөөлж явах гэсийм...