Бичих юм олдохгүй байгаа гэж өчигдөр хэлсэн тэ? Бодоод үзэхэд үгүй юмаа хэхэ. Олон юмаа бичихгүй нуугаад байгаа юм биш үү? Бичээд хэнд хэрэгтэй юм гэдэг бодлоос илүү намайг сайн таньдаг, мэддэг олон хүн миний энэ бичээд байгааг уншдагаас шалтгаалаад ичээд байна гэхгүй юу хэхэ.
Нуух юм байгаа юм уу даа ингэхэд, гэхдээ арай ч пүү паа гэхээр юм байхгүй л дээ, хүн юм чинь хааяа бухимдмаар бас хүнд хэлмээр нууц, хүн муулмаар юм байж л байштэ хэхэ.
Ойрд сэтгэл сэргээсэн гоё ном уншсангүй, кино үзсэнгүй бас сэтгэл догдлуулсан ямар нэг зүйлтэй таарсангүй. Эртүүд нэг хүний дурсамжийг уншчихаад яагаад би өөрөө ингэж бичиж болдоггүй юм гэж бодсон ч бичих тухай санахаас ч зүрхшээгээд зугтаагаад хэхэ.
Гоё ном хаанаас олоод уншчихдаг юм билээ, гэрээс гарахгүй байгаа хүн чинь ном олж унших гэж амаргүй, харин хичээлийн холбогдолтой ном, сурах бичгүүд байгаа ч би сөхөж харах ч хүсэл алга.
Нэгэнт номын тухай бичсэнийх та нарт олоод уншвал зайлшгүй хэрэгтэй, олддоггүй юмаа гэхэд тийм ном байдаг гэж мэдэж байхад илүүдэхгүй хэдэн ном сануулъя.
Монголын соёлын түүх
Гурван боть цэнхэр хавтастай ном байгаа. Оюутны хэдэн жил энэ номыг номын сангаас цагийн хязгаартай авч уншаад, худалч хүнд өдөрт нэг удаа тас тэвэрсээр төгсөж байсан юмдаг хэхэ. Олдоц муутай, номын санд тэр бүр байдаггүй, байлаа ч олон биш, гэрээр авч уншихыг зөвшөөрдөггүй ховор ном. Өөртөө авах гэж хайгаад олоогүй юмдаа. Ялангуяа нэгдүгээр боть нь маш сонирхолтой. Энэ гурван боть номыг уншсан хүн ерөнхийдөө Монголынхоо түүх, соёлын тухай нүүр улайхгүй мэдлэгтэй болно шүү. Сайн бүтээл.
И.Майский Автономитийн үеийн монголчууд
Монголчуудын тухай гадны хүний нүдээр харж, бичигдсэн тэмдэглэл гэхэд болно л доо. Зарим хүн монголчууд хэзээ ч ийм байгаагүй гэхчлэн зүтгэж санал нийлдэггүй, миний хувьд энэ номноос олон юм мэдэж авч бидний өвөө эмээгийн аав ээжийн үед монголчууд ямархуу амьдарч байсан тухай бага ч болов мэдэж авсан.
Монгол үндэсний биет бус соёлын өв
Энэ ном бараг л олдохгүй болов уу. Саяхан гарсан гэхэд тэр шүү дээ. Их дээд сургуулийн болон бусад номын санд мэр сэр байгаа. Англи, Монгол хэлээр. Гэхдээ англи хувилбар нь цөөхөн байгаа байх. Зайлшгүй олж уншвал зохих МАШ ЧУХАЛ, САЙН БҮТЭЭЛ шүү гэмээр байна. Угаас худалдах зорилгоор хэвлээгүй. Нэг номын худалдаанд 35 мянга гээд ганцхан ширхэг байхыг харсан, тэр бол хулгайн ном байсан байхаа.
Санаж байгаа, тоймтойгоо дурдвал нэг иймэрхүү. Уншсан хүмүүс нь бас санал бодлоо хуваалцаарай.
Comments
Post a Comment