Нэг сайхан

бичлэг бичмээр санагдах юм. Тэгээд бичих гэхээр хэлэх гэсэн үг хоолой давахгүй гэдэг шиг л хуруу давахгүй.... Уг нь бодсон юм зөндөө байна даа.

Амьдралын хэмнэл? 

Хэвээрээ гэх үү дээ. Ойрд нэг хөтөлбөрийн deadline тулчихаад материалаа амжиж өгөх гээд л амьсгаа дээгүүр байна. Үүшээ та нараас асуух юм байна. Та нар хөтөлбөрт материал өгөхдөө тодорхойлох захиа авахад ямархуу байдаг вэ? 

Манай Монголд ийм юм уу миний хамтрагчид ийм юм уу ер нь ойлгодог нь цөөн. Урд нь хэдэн жилийн өмнө нэг хөтөлбөрт хамрагдахдаа анх байгуулагдахаас нь эхлээд хамаг ажлыг нь нугалж босгож, 2-3 жил ажилласан төвийнхээ даргаас тодорхойлох захиа авч байж явж байсан юм. Магтаж барьсан юмгүй зүгээр л үнэн байдлыг бичсэн тодорхойлолт авч байлаа. Тэгсэн сүүлд нь би чамайг гадагш явуулсан, тусласан гээд мөн ч их чихнээс хонх уясан. Чимээгүй л өнгрөөдөг ч дотроо бол би энэ төвийг нь байгуулахад анхнаас нь арьс үсээ зулгааж ажилласан юм чинь яахаараа ажилладаг нь үнэн гэсэн тодорхойлолт авахад ингэж үнэрхэж сонин зан гаргадаг юм гээд их л урамгүй байсан юмдаг. Тэгсгээд цалингаа голоод ажлаасаа гарсны дараа хүн амьтанд ихээ муулж ярьсан байж билээ хэхэ. Дарга, удирдлагын бодлоор бол хүн өсж дэвжээд юм үзээд нүд тайлаад эхлэхээрээ өөрийн ажиллаж байгаа орчин, нөхцлөө ойлгоод тэгээд морь нохой, зарц барлаг шиг зүтгэхээ больчих учраас нүдэн балай чихэн дүлий, уяатай нохой шиг л албан тасалгаандаа насыг барвал зүйтэй байдаг юм даг уу.

Одоо ажиллаж байгаа газарын дарга маань их дэмжиж тодорхойлолтыг элдэв хэл амгүй өгөх хэмжээний боловсролтой хүн. Харин хоёрдагч тодорхойлолтыг авахад хамт олон нийтийн ажил хийдэг, эсвэл сургуулийнхаа багш нараас авах болдог. Тэд нар болохоор чи өөрөө бичээд ир, би гарын үсэг зураад өгнө гэх юмаа. Уг нь бол тэд нарт би ямар сэтгэгдэл төрүүлдэг, яаж нөлөөлдөг, хамт ямар амжилтанд хүрсэн гэх мэтээр тэдний сэтгэлийн үгийг бусдад сонсгомоор байхад даа ккк. 

Бас тэгээд их олон тэтгэлэг, хөтөлбөр, янз бүрийн ажилд орох өргөдөлд заавал хоёр тодорхойлолт гээд байдаг, тэгэхээр дахин, дахин авах шаардлага гарна. Тэнцэх нь ч байна тэнцэхгүй нь ч байна. Хүмүүс болохоор нэг тодорхойлолт өгсөн бол шууд бүтэх ёстой гээд асуугаад манийг нь гацаанд оруулчих юм даа.

За юун сайн сайхан бичлэг, хаха шал далий юм биччихлээ. Гэхдээ санаж явбал бүтнэ, сажилж явбал хүрнэ. Нэг нартай сайхан өдөр сайхан бичлэгээ бичээд хүн амьтныг бултаар нь уйлуулж дуулуулнаа гэж.