Аз жаргалын шалтгаан

Бүхнийг зөнд нь орхих, бас бусдаас аль болох зайгаа барьж өөрийгөө дуртай юмаар нь зугаацуулах :)

Надад өч төчнөөн дуртай юм бий. Сүмийн хашаанд хуучин дуган ширтэн зогсохоос өгсүүлээд аль нэг буйдхан хоолны газарт хоолоо хүлээнгээ эрт, эдүгээг эрэгцүүлж суух.

Бие сэтгэл хөнгөрч хэрэгтэй хэрэггүйг сэгсэрч унагаагаад зөвхөн өөртөө цаг гаргах шиг жаргал үгүй.

Үүнд заавал мөнгөтэй байх, ганган байх, эсвэл хэн нэгнээр хайрлуулах, халамжлуулах албагүй. Харин эрүүл байх, сэтгэл санаа, цаг завыг бусинуулах хэн нэгэнгүй байх л чухал :)

Тэгээд мэдээж дуртай шүлгээ унших, нүдээ онийлгон нар гялбалзахыг мэдрэнгээ ямар нэгэн зүйлийн тухай ялимгүй хирнээ огт бодож байгаагүй өнцгөөс зуурч авахыг хичээн санаан дотроо хөөцөлдөх. . .

Эцэст нь бичнэ дээ бичнэ. . . хэзээ нэг цагт бичнэ, гаанс бэлэглэхээр амласан ч өгөөгүй л яваа тэр эрхэм зохиолчид ямар нэг гаанстай хамт бичсэн зүйлээ илгээнэ гэж бодсоор сунаж унан сүүжээ амраахаар гэрийн зүг сажилж одох. . .

***    ***    ***   ***   ***    ***   ***   ***   ***

Хол явах юмсан, орон гэрээ санаж уйлах юмсан.
Хоног өдрүүдийг тоолж, хэн нэгний нь илгээсэн нулимсан дусалтай захиаг уншиж өөрийгөө мэдрэх юмсан…

Цаг цагийн аясыг үзэж, олон хүнтэй танилцах юмсан.
Цайдам дагаж нүүдэллэсэн хэдэн бор гэртээ хоргодон
Цаасан дээр өд зурж өдөр бүр нисгэх юмсан.

Уй гунигийг нь хуваалцаж хэн нэгэнтэй нь дотно сайхан үерхэх юмсан.
Урины шувуу мэт нисч ирээд сэтгэлд нь бууж бүлээцүүлэх юмсан.
Зунжин орсон борооноос уйдаж, нарыг хүсэж намар болохыг удтал хүлээх юмсан.
Зуны үдэш шал нойтон хувцастай сарны туяа туучиж ус зэтгүүлэх юмсан.

Хүйс хүйсхэн салхинд санаа алдахуй нөхөрийнхөө инээмсэглэлийг санаж дулаацах юмсан
Хүний явдлыг тунгааж намрын навчис адил уянгатайхан амьдрах юмсан.
Араг үүрч аргалд явах юмсан, бодол түүх юмсан.
Айлынхаа охиныг мөрөөдөж зүүдлээд нүдэн дээр нь үнсэх юмсан.

Борог өвсний үзүүр ганхуулах салхины чимээг мэдрэх юмсан.
Бор бор бялзуухайг исгэрч хангинтал дуулах юмсан.
Талын ногооны шивнээг сонсож бүсгүй хүнийх шиг үнэрийг нь таалах юмсан.
Таагүүрийг ойлгож, тасарсан навчисыг өрөвдөж, гэгээ татуулан унах харавсан одны хэлтэрхийг үзэх юмсан.

Хол явах юмсан, орон гэрээ санаж уйлах юмсан.
Хоног өдрүүдийг тоолон
Хэн нэгний нь илгээсэн нулимсан дусалтай захиаг уншиж өөрийгөө мэдрэх юмсан.

Цаг цагийн аясыг үзэж, олон хүнтэй танилцах юмсан.
Цайдам дагаж нүүдэллэсэн хэдэн бор гэртээ хоргодон
Цаасан дээр өд зурж өдөр бүр нисгэх юмсан

Д.Баттогтох
Мөрөөдлийн шүлэг