Тэнэж яваад Hotel Hostel захиалгын сайт руу орчихлоо. Сонголтыг баахан харлаа, ийш тийш явах хэрэг гарвал урдчилаад захиалчих боломжоо олж харсандаа баяртай байгаа.
Hotel, Hostel ямар ялгаатай вэ гэж үү?
Албан ёсны хэллэгээр биш энгийн хар яриагаар тайлбарлавал Hotel гэдэг нь зэрэглэл өндөртэй, албан ёсны, нэг дор маш олон хүн хүлээн авах хүчин чадалтай, зэрэглэлээсээ хамаарч од авдаг, ихэвчлэн 2-4 хүний ортой олон тооны өрөөтэй гэхчлэн та бүхний мэддэг зүйлс байгаа. Зочид буудал гэхийм байна.
Hostel гэхийг монголоор яг юу гэхээ мэдэхгүй байна. Дэн буудал гэдэг юм уу гэхээр Motel-ыг л дэн буудал гэвэл таарна, Hostel гэхээр нийтийн байр, Guest house нь зочинд өрөө хөлслүүлэх үйлчилгээ (Hostel-тэй төстэй) гэвэл ойлгогдож байна уу хэхэ. Иймэрхүү хямд төсөр, хувь хүний үзүүлдэг аялагч, айлчин байрлуулах үйлчилгээг Solo travel хийж яваа аялагчид голдуу сонгодог.
Миний хувьд Hotel, Hostel-д байрлаж үзсэн харин Motel, Guest house-д байрлаж байгаагүйм байна. Америкт билүү Мотелыг зам зуурын дэн буудал маягаар ашигладаг бол урд зүгт Мотельд орлоо гэвэл манайхны хэлдгээр хоёр хос том хүний ажил хийх газар ороод гарлаа гэж ойлгодог тиймээс тэгж яривал эвгүй байдалд орно шүү гэж найз маань аминчилж захиж байсым байна хэхэ.
Илүү сонирхолтой гэдгээр нь Hostel-ын тухай ярья л даа. Нэгээс хоёр хүн байрлах өрөөнүүдээс гадна нэг дор нийтийн 8-14 хүн хүртэл багтаах өрөөтэй, ихэвчлэн гал тогоо, зочны өрөө, угаалгын өрөөгөө дундаа ашигладаг, үнэгүй Wi-Fi үйлчилгээтэй, нэмэлт төлбрөөр хувцсаа угаах, индүүдэх үйлчилгээг үзүүлдэг нийтлэг шинж чанартай байхым билээ.
Хямд учир аялаж яваа хүмүүст хажуулдаж хэвтэж, ташаагаа амраах ор, унтаж амрах, ойр зуурын ариун цэврийн үйлчилгээ сахичих боломжтой нь давуу талтай. Өглөө гараад гадуур зугаалж тэнэж, үдшийн бор хоногтоо ирж унтдаг учир энэ нь ч амар. Зарим газар өглөөний унд үнэгүй өгдийм билээ.
Миний байрлаж байсан Hostel бол боломжийн л байсан. Нийтийн 8 хүний өрөөнд орж, нэг хоноод том чемоданаа орхиж яваад бараг 14 хоногийн дараа буцаж ирээд чемоданаа баяртай нь аргагүй ухаж хувцсаа гаргаж өмсөөд 2 хонож байлаа. Гэр орноосоо хол, хүн танихгүй газар үүн шиг сайхан боломж байхгүй санагдсан шүү хэхэ.
Гурван шүршүүртэй, бас 2 00-ын өрөөтэй, цаанаа 3 угаалтууртай, гал тогоогны өрөөнд байгаа бүхий л хэрэгсэл, сав суулгыг чөлөөтэй ашиглах боломжтой байсан. Мэдээж хүссэн хоолоо хийгээд идэх боломжтой гэсэн үг. "Хэрэглэсэн аяга тавгаа заавал угааж байна уу эс тэгвээс бид ээж рүү чинь залгаж ярих болно шүү" гэсэн нөхөрсөг зөвөлгөөтэй, мөн савтай хоол ундандаа өөрийн нэрээ бичиж хөргөгчинд хадгалахыг ч сануулсан байлаа.
Хувцас угаах нь монгол мөнгөөр 4000 орчим байлуу даа. Тэр мөнгийг угаалгын машиндаа холбосон процессортой хайрцагт хийгээд бүх хувцсаа угааж хонуулаад үнэгүй индүүдээд авах боломжтой. Нойлын өрөөндөө болохгүй ажил хийхийг хориглосон бичиг байхыг хараад за энд ирсэн улс бас зүгээр байдаггүй байх нь гэж инээд хүрч л байлаа.
Мөн аялагчид өөрсдийн хэрэглээд дуусалгүй орхисон оо, саван, шампунь, нүүр цэвэрлэгч, тос гэхчлэн зүйлсийг хийдэг тусгай сагстай, түүн дээр та эндээс үнэгүй авч хэрэглэж болно, бас хүсвэл өөрт хэрэггүй зүйлсээ нэмж болно гэсэн бичиг хадсан байсан санагдана.
Үнэгүй интернеттэй, газрын зураг өгдөг, хаашаа явж юу үзэхээ асуухад тодорхой тайлбарлаад өгдөг гэхчлэн зөндөө л зүйлсээр тусласан.
Хэсэж яваад орсон сайтаасаа Монголынхоо үйлчилгээг үзтэл дан том том зочид буудал байнаа. Хэрэглэгчдийн сэтгэгдлийг харлаа. Естой ёонооооооо ..... Кемпенский л хамгийн гайгүй үнэлгээг авчээ. Ихэнхи нь байршил сайтай, ганц нэг нь үйлчилгээний ажилтнууд нь ааш сайтай гэх боловч голдуу л гомдоллосон, шүүмжилсэн сэтгэгдэл үлдээж.
Тоос шороо ихтэй, цэвэрлээгүй, халуун ус нь тасалддаг, өрөөний эд хөрөнгө нь эвдэрхий, жорлонгоо цэвэрлээгүй муухай үнэртэй, үйлчилгээний ажилтнууд нь хэл мэддэггүй, үйлчлэхдээ үнэн хойрго, буруу захиалга авчирч өгчихөөд тоодоггүй, захиалсан хоолноос нэг биш удаа үс олсон, зарим нь бүр нойлын цаасгүй, нэхэж байж арай гэж авсан. За тэгээд хамгийн их таалагддагүй зүйлс нь дэндүү их дуу чимээтэй гэнээ. Пума хажуудаа шөнийн клубтэй, Сүнжин гаранд унтах цаг болсон байхад каракоед хүмүүс дуулалдаад унтуулдаггүй, Нөгөө Макс Моллын зочид буудал юу билээ тэр хавьд их дуу чимээтэй, тоостой газар байрладаг, шөнө унтаж чаддаггүй гээд л авч өгчээ...
Үйлчилгээндээ таарахгүй өндөр үнэтэй, 5 одтой буудал гэдэг ч 3 одтой буудал шиг л үйлчилгээ үзүүлж байна гэсэн гомдол ч мэр сэр байлаа. Дээрээс нь УБ хотын түгжрэл, таксины үйлчилгээ хэцүү, буудлын зоогийн газрын үйлчлэгч илүү мөнгө хураах гэж оролдсон, хэд хэдэн удаа мэйл бичээд байхад огт хариу өгөөгүй, хүсэлтийг нь баталгаажуулаагүй, ирээд хэлэхэд манайх зөвхөн утсаар захиалга авна гэсэн, нисэхээс үйлчлүүлэгчдээ тосох эсэх нь тодорхойгүй гээд зөндөө сөрөг зүйл бичсэн байлаа.
Гадаадууд л биднийг мууллаа гэж бодож болох ч үнэндээ манайхан яг нүдэнд харгадаад байгаа байхгүй юу. Хөдөлж ядаад л байж байсан байхдаа гэмээр хэхэ. Hostel байгаагүй гэж дээр хэлсэн дээ, байсан бол бүр "аймаар" юм унших байлаа гэвэл алуулдым болов уу хээхэ...
Comments
Post a Comment