Хэл болоод толгойн тухай үлгэр…

“Урт хэл хүзүү орооно” гэдэг үгэнд нэмээд би “Том толгой хүнийг онхолдуулна” гээд хэлчихмээр байнаа. Тэр том толгойт нь чухам би өөрөө байгаа юмаа.

Яасан гэхээр ингэсийн… Гэнэт анзаарахнээ би чинь айхтар том толгойтой хүн байх нь. Энэ нь яаж илрээд байна гэвэл би бусдын үгийг бараг хүлээж авдаггүй, өөрийнхөөрөө зүтгэнэ. Тэгээд уначихаад “яадын миний унах бол миний л асуудал” “унадаггүй хүн олоод ир” гэхчилэн хэдэрлэнэ. Аз болж том толгойн ачаар жижигхэн амжилт олвол өөрийгөө их сайн гэж итгэнэ.

Хамгийн тодоор илэрдэг жишээ нь гэвэл би бусдаас юм асуудаггүй шууд өөрөө шийдээд байна. Ухаан нь надад бусдаас суралцах боломж хомс байжээ. Үндсэндээ хүнээр юм заалгаж үзээгүй хүссэн юмаа өөрөө сурсан гэсэн үг. Хэтэрхий хаагдмал ийм замыг туулж ирсэн болохоор нэг тийм гажиг хүн болжээ.

Тийм учраас одоо ямар нэг юм хийх гэхээрээ бусад хүнээс яах уу ийх үү, энэ ямар байна гэхчлэн асуудаггүй, хийснээ үзүүлдэггүй шууд л алдаж оносон, буруу зөв хамаагүй өөрийнхөөрөө хийгээд дуусгаад бандан тас!

Заримдаа бол сохор азаар ч гэх үү ононоо хөөрхий. Харин ихэнхидээ бол бусдаас илүү гарахгүй дундаж хавьцаа нь будилсаар дуусдаг байх нь.

Сая нэг бичсэнээ хүнд үзүүллээ. Зөвхөн үгийн алдаа шалгаад өгөөрэй гэсэн болохоор тэр хүн засч өгөөд эцэст нь “Нэг л замбараагүй байна, зорилгоо барьж бич, тэгэхгүй бол энд тэндээс янз бүрийн юм авч бичээд үсчээд хүн ойлгохгүй нь байна” гэнээ.

Гол гэсэн ганцхан санаагаа л хэлэв бололтой. Хэрэв бичсэн сэдэв дээр саналаа хэлээрэй гэсэн бол бүр галзуу олон санаа хэлэх байсан байхаа. Миний нүүр ч их улайлаа.

Бодоод байхнээ би хэтрэхий хаагдмал зожиг, аминч өссөн болохоор хүнд юухан хээхнээ ч хэлдэггүй, үзүүлдэггүй, зөвшилцдөггүй том толгойтой болж хувирсан байх нь.

Бараг анх удаа зөвөлгөө авсан гэх үү дээ, өөрөө өөрийгөө дарж байж л бичсэн зүйлээ хүнд үзүүлсэн нь энэ. Дараа нь нээрээ бодлоо. Бодоод байхаар нээрээ л миний бичсэнийг хүн ойлгохгүй байх нь.

Гэнэт айхтар хүний эрхийн төслийн тухай бичиж байснаа гэнэт хувираад малчин байсан тухайгаа, ааруул ээзгий хэрхэн хийх тухай дэлгэрүүлээд бичихээр хүн ер нь юу гэж ойлгох уу? Энэ ер нь орон гаран л хүүхэн байна гэх байлгүй хаха.

Том толгой гаргаад байвал ер нь Арго багшийн зиндаанд л очих юм байна шүү. Ах маань уг нь их хэлдэг байсан юм. “Мэдэхгүй чадахгүй юм байвал хүнээс сайн асууж бай та нар” гэж

Тэгсэн дүү нь яаж байна, асуудаггүй байх нь. Толгойгоо стандарт болгож бусдаас уйгагүй суралцаж өөрийгөө чадавхижуулахгүй бол яг нэг зүйлийг голлож суралгүй байсаар нас жилийг барах нь байна шүү залуус минь…