Олимпийн эргэн тойронд.

Рио Олимпийн сонин сайхнаас дуулж мэдсэн зүйлс....

Нэгэн зүйл: Залуу нас эрч хүч шаарддаг олон төрөлд нас хамааралгүй өрсөлдөж буй алдарт тамирчдын дунд Оксана Чусовитина хүндтэй байр эзэлж байна. Энэ бүсгүйн тухай миний урд нь оруулж байсан бичлэг энд буй. 

Амжилт тэмцлийн шалтгаан болсон ганц хүү нь хэдийн 17 нас хүрчээ

Сонирхуулж хэлэхэд Гимнастикийн спорт маш хүнд хэцүү төрлийн нэг учир 20 нилээн гарсан бол энэ спортоор амжилт гаргана гэж саналтгүй гэдэгтэй олонхи хүмүүс санал нийлдэг. Үүний нэг баталгаа нь Америкийн гимнастикийн багийн ахлагч 22 настай Aly Raisman-ыг багийнхан болон олон нийт нууцханаар "Эмээ" гэж нэрлэдэг гэнэ. Гэхдээ мань "эмээ" одоогоор Рио-гоос Алт, мөнгө 2 медаль хүртээд байна.

Хамгийн бахархууштай нь Чусовитина энэ удаагийн Рио-гийн Олимпт төрөлх эх орон-Узбекстан улсынхаа нэрийн өмнөөс оролцож буй төдийгүй тавцантай харайлтын төрөлд урьдчилсан дүнгээр 5 дугаарт бичигдэж ирэх Даваа гаригт шигшээ тэмцээнд өрсөлдөх 8 тамирчны нэгээр тунаж үлдээд байна. Түүнтэй өрсөлдөх залуухан аваргууд нь түүний хүүгийн үеийнх гэхээр үнэхээр сэтгэл хөдлөм. Бурхан өршөөг! Медаль авах болтугай!

Нэгэн зүйл: Бас нэгэн гайхамшигт ээж, гайхамшигт тамирчин бүсгүйн түүх олон хүний нүдэнд нулимс хуруулжээ. Түүхийн эзэн нь Риогоос Олимпийн гурав дахь алтан медалиа хүртсэн алдарт дугуйчин Kristin Armstrong. 

Хүү нь өсөж том болоод хүрэн тасын жигүүр ургана. Тэр цагт л ээжийгээ юуны төлөө
зорьж зүтгэж байсныг ойлгох буй за

Энэ бүсгүйн ялалт амжилтын цаадах үнэнийг өгүүлсэн видео олон хүний хамрыг шархируулж байна. Фэйсбүүк хаягтай хүмүүс энд ороод тухайн бичлэгийг нь үзээрэй. 2008 онд Олимпоос анхны алт авсны дараахан буюу 2009 онд гэр бүлтэй болж, 2010 онд хүүгээ төрүүлжээ.

Төрөөд удаагүй ч бэлтгэлдээ эргэн орж 2012 оны Лондонгийн олимпт дахин аваргалж. Тэр үедээ "Хүү минь шагналын тавцанд надтай хамт зогсоосой гэж би маш их хүссэн, энэ бодол ямагт намайг зоригжуулж, өглөө бүр үүрийн хүйтэнд бэлтгэлдээ гарах хүчийг өгдөг байсан юм шүү" гэсэн утгатай мэдэгдэл хийж байж.

Үнэхээр ч зорьсондоо хүрч Лондонгийн алтан медалийн тавцанд хүүтэйгээ хамт зогссон билээ.

Энэ жилийн Рио Олимпт тэр хамгийн ахмад насандаа буюу 42 насандаа Алтан медаль авсан эмэгтэй дугуйчин болж байна. Медалиа зүүгээд хүү дээрээ очиход учир мэдэхгүй 5 настай хүү нь ихэд гайхаж "Ээжээ та яагаад уйлаад байгаа юм бэ? та чинь түрүүлчихсэн шүү дээ" хэмээн дуу алдсан гэнэ.  Хожим хойно яагаад ээжийгээ уйлж байсныг, амжилтын утга учрыг хүү нь ойлгох нь тодорхой. Кристи нутагтаа буцаж очоод дунд сургуулийн бяцхан багачуудад медалиа үзүүлж ярилцах мөчийг тэсч ядан хүлээж буй гэнэ.

Алт авсныхаа маргааш тэр нэг нас нэмж 43 нас хүрсэн нь бас нэгэн онцгой тохиолдол болж түүхэнд бичигдэж байна.

Нэгэн зүйл:  Хэвлэл мэдээллээс биш миний өөрийн саваагүй зандаа хөтлөгдөн олж мэдсэн сонирхолтой түүх. Этопийн Оромио омогийн Dibaba-гийн гэр бүл аль хэдийнээ Риогийн олимпийн ээлжит медалиар гэр бүлийн цуглуулгаа аривжуулаад байна. Сонирхолтой нь эдний удмынхан 1992 оны Барселоны Олимпоос эхлэн зөвхөн Атлантын олимпийг эс тооцвол медалийн буухиагаа бараг таслаагүй билээ. Олимпийн түүхэнд Африк тивээс тодорсон анхы эмэгтэй аварга, Олимпийн хошой аварга Derartu Tulu бол Dibaba-ийн охидын үеэл эгч нь. 

Derartu Tulu Олимпийн 2 алт 1 хүрэл медальт,
Дэлхийн аварга

Тамирчин хүнд тохиолдох ноцтой гэмтэл бэртэл энэ гэр бүлийн Олимпийн медалын цувааг Атлантад тасалж орхисон хэрэг. Үеэл эгчийнхээ Олимпийн медалийн цувааг Dibaba-гийн охид үргэлжлүүлж Афин, Сидней, Бээжин, Лондонгоос алт мөнгө хүрэл зөндөөнийг хүртсэн бол дэлхийн аваргын медалийнх нь тоог бараг өөрсдөө мэддэггүй биз хэхэ. Энэ гэр бүлийн 6 хүүхдээс 3 охин нь хамтдаа Лондонгийн олимпт оролцож байсан бол энэ удаад 2 охин нь Риод оролцож эхний хүрэл медалиа авчихаад байна.

Tirunesh Dibaba Олимпийн 3 алт 3 хүрэл медальт, Дэлхийн аваргаас гүйлтийн төрлүүдээр 10 удаа
алтан медаль хүртсэн бүсгүй.

Этиоп хүүхнүүдийн шинж болсон гоо үзэсгэлэн, ичимхий даруу байдлаараа тэд бас алдартай. Дэлхийн олон орны хэвлэлүүд эгч дүүсийн амжилт хийгээд гоо үзэсгэлэнг магтан дуулдаг билээ. Тэмцээний талбар дээр бол энэ гэр бүлийхэн хоорондоо өрсөлдөж Мөнгө, Хүрэл медалийн тавцанд хамтдаа зогсох удаа ч байв.

Genzebe Dibaba. Гоо үзэсгэлэнгээрээ бүгдийг бишрүүлж буйн зэрэгцээ энэ бүсгүй бол Дэлхийн рекордыг эзэгнэж байна. Нэгэн гэр бүлийн эгч дүүс дэлхийн рекордыг эзэмшиж буй ховорхон тохиолдол зөвхөн эднийх.

Ирэх даваа гаригт дэлхийн рекордыг эзэмшигч Genzebe нь хагас шигшээ уралдааны замд гарах бол дэлхийн хөнгөн атлетикийн мэргэжилтнүүд тэдний эрэгтэй дүү Dejene-г ирээдүйн Олимп, Дэлхийн од хэмээн өргөмжилсөөр байна.

Ууган эгч Ejegayehu Dibaba. Олимпийн мөнгө, дэлхийн аваргын багийн төрлийн алтан медальт

Энэ гэр бүлийн медалийн буухиа, спортын замнал цаашид ч үргэлжилэх нь тодорхой юм. Олимп, дэлхийн аварга Tirunesh нь Олимпийн хошой мөнгөн медальт Sileshi Sihine хэмээх нутаг нэгт залуутай хуримлаж хүүтэй болсон бөгөөд спортод хайртай олон нийт тэдний бяцхан хүүг аль хэдийнээ ирээдүйн Олимпийн баатраар өргөмжлөөд байна. Дэлхийн хамгийн хурдан энэ гэр бүл спортын талбарт амжилт гаргахын зэрэгцээ зочид буудлын бизнес эрхэлдэг аж.

Sileshi Sihine Олимпийн хошой мөнгө, дэлхийн аваргын гурван мөнгөн медальт