Завтай гэхэд дэндүү завтай хүн юм уу даа би? Яасан байх нь уу янз бүрийн дэмий юманд санаа зовдог байх нь. Заримдаа өөрийгөө гайхах ч шиг, бусдын төлөө санаа зовоод яасан сайхан завтай хүн бэ чи өөрийнхөө төлөө санаа зовох юм чамд байна уу өөдтэй гутал ч байхгүй байж бусдад үнэ хөлсгүй туслах, бусдын төлөө хошуу амаа билүүдэж арай илүү эрх мэдэлтэй нэгэнд нь ад үзэгдэх ямар хэрэг байна гэхчлэн тархиа гашилганам.
Зүгээр сууж чадахгүй л хүн юм би. Энэ их идэвхи зүтгэлээ мөнгө төгрөг олох үйлст зарцуулдаг бол өдийд би нь Марк Цукенберг шиг биш юм аа гэхэд хангалттай сэхүүн загнахуйц мөнгөтэй байх байсан байхдаа.
Харамсталтай нь мөнгөтэй харьцаж сураагүй болохоор үнэ цэнийг нь төдийлөн мэддэггүй хэвээр. Мөнгөний утга учрыг олчихмоор, мөнгө гэгч тэр этгээдтэй ойр дотно танилцаад ойлголцчихмоор байна.
Хийж байгаа ажлаа нэгмөсөн хаяад нэг л өдөр бизнес рүү орж түйвээж баяжиж мэдэх л юм хэхэ.
Ер нь бол би амьдралдаа бизнес хийсэн нь ховор гэхдээ ер нь шатах дургүй хүн л дээ. Аливаа юманд балнасаа яг барьж байх дуртайгаас биш хамаагүй тээр хол зөрүүтэй шатах эсвэл орлого олж амаараа сагатал баяжих тухай ойлголтгүй хүн байх нь.
Нээх мөнгөтэй залуутай танилцах тухай бодмогц хорголоо тоолсон эсвэл хямсагнаад юм болгонд бичигдээгүй дүрэм ярьж сүр болоод байдаг хүнд ясны дургүйгээ саналаа.
Мөнгөтэй гэдэг хүмүүс дотроос миний мэдэх мөнгө, төгрөгтэй зөв сайхан харьцчихдаг танил санаанд орохгүй байна. Нээх баян царайлж баахан хүн амьтан дайлчихаад дараа нь дайлж цайлсан хүмүүсээ идсэн ууснаар нь дуудаж муу муухайгаа дэлгээд байдаг хүмүүсийг одоогийн манай нийгмийхэн мөнгөтэй гэж хараад байх шиг.
Миний ажигласнаар мөнгө гэдэг бол хийж байгаа ажлых нь үр дүн болоод ороод ирдэг ч эзэн нь мөнгөний төлөө биш харин ажлын төлөө, ажилдаа дуртай болохоор хийгээд байдаг тийм хүмүүс харьцангуй эрх чөлөөтэй мөнгөнөөс хараат биш амьдардаг юм шиг ээ.
За гэнэт л юу болоод зоос яриад уначихваа гэхээр өмнө нь миний хэлж байсанчлан би мөнгийг оролдоогүй байхад зоос өөрөө нааг оролдоод амьдралын шаардлага гарч ирээд байхым.
Эцэст нь далийчихад мөнгө, төгрөг гэдэг чинь байнаа мөнгө ч яахав ойлгомжтой металл гэсэн үг харин төгрөг гэж юу болохыг та нар мэдэх үү?
Төгрөг гэдэг чинь "Дугуй" гэсэн үг шүүдээ. Анхны мөнгө цаас биш зоосоор тэгэхдээ дугүй хэлбэртэй байснаас Монголчууд төгрөг гэдэг болсон гэсэн. Төгрөг гэх энэ үг анхны утгаа бараг гээж ихэнхидээ гүйлгээнд ашиглах тэмдэгтийг илэрхийлсэн үг болсноор энгийн ярианд одоо хэрэглэвэл орчин үеийн залуус тэр бүр ойлгохгүй байхдаа.
Угтаа бол "Уруул төгрөг байснаа аажмаар цорвойж" гэхчлэн гоо сайхны зөвөлгөө өгөх жишээний байх ёстойм. Төгрөг сар гэх мэтсийн ганц нэг үг л ярианы хэлэнд анхны утгаараа үлдэж дээ...
Comments
Post a Comment