Монгол

Шинэ Зеландчуудын амьдралын хэмнэл нь нэг тийм баяр баясгалантай хийгээд тайван. Эзгүй том далай дунд хаягдсан хэсэгхэн газар гэж төсөөлөхөд ч тэр...  

Маш цэвэрхэн агаартай, байгальтай жинхэнэ натураль бүхэн тэнд л байдаг гэж болохоор. Хамар хоолой хорсгох ямар ч юм мэдрэгдсэнгүй. Сониноос харин бөөс хуурс их юм шиг байгаан. Бөөс хуурсны эсрэг шампунь тос их. Хэт натураль болохоор бөөс үрждэг юм уу даа хэхэ.

Удаад ирвэл жаахан уйдах шинж төрмөөр. Учир юу вэ гэвээс ямар ч улстай хиллэдэггүй, бусад улс орноос хол учраас бүх юм хэвийн хоорондоо адилхан ч гэхүү соёлын хүчтэй урсгал тасралтгүй явагдах нь бага юм шиг санагдсан.

Аа харин санаанд оромгүй гайхшруулсан зүйл гэвэл дайны түүх гэхээрээ дэлхийн 1, 2-р дайнд оролцсон тухайгаа бүр Туркт очиж байлдсан ч гэнэ үү юм гараад түүхийн музей энэ тэрд яриад байхаар би баахан гайхаад байсаан хэхэ.

Хаа хол үхэж хэвтсэн Турк Орост ямар юмаа хийж танайхан дайтсан юм гээд ангайгаад хэл амаа гаргаад гайхширав уу яав хэхэ. Британийн армид хүч зузаатгаж очиж оролцсон юм даг уу даа. Тэрнээс биш Маоричуудтай хийсэн дайнаа музей энэ тэрд төдийлөн үзүүлдэггүй санагдсан.

Kia Ora..... 

Олон ч Маоричуудтай танилцаж найз нөхөд боллоо. Дараа тухтай ирж манай гэрээр очоорой гэж захиад хамгийн хүндэт хүндээ өгдөг шувуун нулимсаа хүзүүнд зүүж өгөөд намайг үдсээн хэхэ. Гэснээс нээрээ Хака үзэх завшаан тохиосон шүү. Мэдэрсэн зүйл гэвэл Хака нь тэдний дотоод эрчим хүчний тэсрэлт л юм байна гэж ойлгосон.

Тэнд насаараа амьдарсан цагаанууд нь хүртэл Маори айлд очиж үзээгүй байх нь зөндөө байдаг юм билээ. Яагаад гэхээр зөвхөн Маори хүний урилгаар зочлох өргөөнд нь ордог гэсэн. Зөндөө ёс заншил байдаг юм байна лээ.

Урт цагаан үүлний оронд явахад тохиолдсон хөгжилтэй зүйл гэвэл байсгээд хэн нэг нь намайг эр хүний төмсөг сугалж иддэг эсэхийг сонирхоод байв. Учрыг нь асуувал нэг алдартай Киви аялагч Монголд зочилж видео хийж тэрийгээ цацсан юм байх. Зочломтой Монголчууд маань тэр үеэр малын засаа сугалж чанаад зочноо дайлсан ч өнөөх нь идэж чадаагүй юм гэнэ лээ. Бодвол хавар зуны заагаар мал хөнгөлөх үеэр таарчаа байлгүй. Тэгээд л фантазлаад эр хүйстэй амьтан л харвал төмсөгийг нь сугалж иддэг хүмүүс гээд наргиантайгаар ойлгочихож хэхэ.

Намайг Викториа уулын орой дээр хүчтэй салхинд хийсч нисч салхинаас зүүгдэж байх үес Монголд оффшорын тухай шуугиан дэгдэж байсан ч энэ үеэр Ботаникийн хүрээлэнгийн цэцэрлэгийн газартай холбоотой маргаан чимээгүйхэн дарагдчих шиг болсон.

Веллингтоны Ботаникийн цэцэрлэгээр зочилж аялахдаа тэр тухай мэдээллийг санаж Монголын эрх мэдэлтнүүдийн тэнэг мулгууг гайхаж хэлэх муу үг олдоогүй билээ. Миний очсон ихэнхи хот суурин газарт тийм цэцэрлэгүүд хамгийн цэвэр, хамгийн сэтгэл сэргээсэн эрхэм газар гэдгээрээ ихэмсэг нь аргагүй оршиж байдаг. Монгол Ботаникийн хүрээлэнгийн газар дээр шал өөр байшин барилга барих гэж байгаа гэж хэлэхэд хамт явсан Кивичүүд дуу алдаж толгой сэгсэрч байв.

Сонирхуулж хэлэхэд Веллингтоны Ботаникийн хүрээлэнгийн яг эсрэг талд Хятадын соёлын төв дүнхийж тэндээс хэдхэн метр яваад БНХАУ-ын ЭСЯ байдаг юм байна лээ. АНУ гэх мэт томоохон улсын ЭСЯ ч холгүй байдаг гэсэн. Цэвэр агаартай, тодорхой хэмжээгээр халдашгүй гэдгийг нь бодолцож тэр хавьд газар аваа юу гэж дотроо бас бодсон шүү.

Хэд хоногийн завгүй аялалаа энэ мэт олон дурсамж, уярал, ухаарал, санаа оноо нэмсээр өндөрлөсөн билээ.