Гэдэсний булчин чангаруулах дасгал хийх гэж оролдоод ёолж ёхлоод буцаж шалан дээр үсэрч унаад байж байна.
Октоберфест, Хоолфест, Залхууфест Айрагфест гэхчлэн дараалсан олон фестеваль хийгээд гэдсээ цэрийтэл ууж идэж байгаа хүн булчингаа нохойн шүд ам шиг ярзайлана гэж худлаа байхаа гэхдээ яах уу зүгээр суухаар зүтгэж янцаглаж суу тийм биз дээ хэхэ.
Аа нээрээ хэлэхээ мартчихаж өчигдөр газар хөдөлсөн шдээ тэ? Тэрийг би мэдэрсээн, туршлагаараа гэх үү дээ намайг хөдөө байхад 90 хэдэн онд газар хөдөлж байсым. Тэгэхэд орон дээр буруу хараад хэвтэж байгаад газар хөдлөхөөр анхандаа ойлгоогүй яасан юм бол гэж эргэж дээш харж хэвтээд орон дээрээ бүхлээрээ үсэрч үзэж би ороо хөдлөгөчихөв үү гэж шалгаж байсан санагдана.
Хоёр ч удаа хөдлөсөн эхнийх нь шөнө дунд хөдлөхөд ээж мэдэж босч гэрээ тойроод баахан алхсан бас айсан юм гэсэн. Тэр үед ч сайхан байжээ монгол гэрт амьдардаг болохоор нурлаа гэхэд бэртэж гавихгүй санаа амар үе байж.
Одоо бол 9 давхар байшинд байгаа тэгээд сууцныхаа чанарт эргэлзээд л байна шүү. Өчигдөр газар хөдлөхөд би анхандаа сайн итгээгүй гэхдээ дотроо газар хөдөлж байх чинь юу вэ гэж бодсон. Яалт ч үгүй газар хөдөллөө гэж мэдсэн хэр нь доод каракое пижигнээд ингэв үү эсвэл гадаах зам засч байгаа хүмүүс газар индүүдэв үү гэж эргэлзээд цонхоор харлаа.
Хойд замаар хүнд даацын кран бололтой урт төмөр ачсан машин явж байхыг хараад аа муу машин чамайг даа газар доргиогоод гэж бодсон ч хэрэв энэ машин тийм их чимээтэй явсан бол цардмал зам хага хага явмаар юм гэж санаад газар хөдөлж гэдэгт бүр баттай итгэсээн.
Хөдөө газар хөдлөхөд ээж маань 57 оны айхавтар шилгээлт ямар байсан тухай ярьж өгч байсан юм. Тэр үед ээж аав маань сурагч байсан үе л дээ. Хичээл хийж байхад нь газар хөдөлж гарч гүйлдсэн ч энд тэнд үсэрч унаад дараа нь хүүхдүүд бөөлжиж, толгой нь өвдөж байсан гэсэн.
Ээжийн аав тэр үед нутгийнхаа нэг хүнтэй хэдэн тэмээ ачаа хөтөлсөн явж байж л дээ. Гэнэт л хэдэн тэмээ нь туйлаад тал тал тийшээ бут үсрээд нэг мэдэхнээ энд тэнд харайж байсан юм гэсэн. Өвөө маань хамт явсан хүнтэйгээ арайхийж тэмээ малаа цуглуулж авч унаанаасаа буугаад сая юу болов яав чөтгөр шуламын дайрлага дайрав уу гэж нилээн удаан тамхилж гайхаж байсан гэнэлээ.
Эмээ тэр үед гэртээ үлдсэн бас айлын авгайтай хууч хөөрөх санаатай гэрт нь орчихсон баруун хаяанд нь усны сав түшээд сууж байж. Заа байж усны савыг юу гэдгийг санадаггүй ээ, ган биш, лүү биш торх биш арай л өөрөөр хэлж байсан. Тэгтэл айлын эхнэр учиргүй уулга алдаж хүүе чи минь битгий усны сав түлхээд бай асгарлаа гэж. Эмээ гайхаж үгүй үгүй би юу гэж түлхэх юм гэж байтал нь хүчтэй газар сэгсэрч хөдөлсөн юм гэсэн. Бодвол эхлээд чичирхийлж савтай ус нь цалгиж байгаад шилгээж л дээ.
Монголчууд газар хөдлөлт гэдэггүй газар шилгээж байна гэж ойлгомжтой тодорхой томьёолж ээ. Албан ёсны хэллэг нь хөдлөлт юм байгаа биз.
Газар шилгээлээ гэхээр Б.Лхагвасүрэн гуайн анд нөхөр Санжийн Пүрэвт зориулан бичсэн "Дарвийн нуруунд газар хөдөлж гэнэ" шүлэг санагдаад айх аюул гэхээсээ илүү уянгын тойрогт орсон юм шиг санагдаад байх. Уран зохиол, яруу найргийн ид шид л юм даа.
Comments
Post a Comment