Сэвэлзтэл алхах уу???

Өнөөдрийн бичлэг эхлэж байгааг мэдэгдэхийн ялдамд эзэн нь мартаж санаад байдаг энэ муу блогоор минь тоож орж гарч, эргэж тойрдог та нартаа маш их баярлаж байгаагаа энэ завшааныг далимдуулаад хэлмээр байна хихихи.

Яг одоогийн хүсэл гэвээс би тархи толгойны ур чадвараа эрч хүчтэй хэвээр нь хадгалмаар байна. Хааяадаа тамирчин хүмүүс, эсвэл урлагийн хүмүүс, мисс загвар өмсөгчдийг толгой хоосон биеийн хүчээр ажиллахаас өөр шидгүй гэсэн үүднээс хардаг хүмүүс мэр сэр байдагтай тааралдаж байсан.

Бас түүнчлэн авъяас байхад толгой ч нэг их чухал биш гэж боддог хүн ч байдаг байх.

Авъяас гэдэг бол ухаан л юм даа...

Харин минийхээр авъяас гэдэг бол зарим талаар цэвэр ухаан, бас толгой сийрэг, өөрөөр хэлбэл ой санамж сайтай, тархин дотроо тооцоо сайтай, баримжаа сайтай, биеэ өөрийн ухаан, тархины тусламжтайгаар удирдаж, түргэн сэтгэж хурдан хөдөлгөхийг л хэлж байгаа хэрэг байх гэж бодож байна.

1 цаг гаран анхлан хичээллэгчдийн "Cat walk" бэлтгэлийг хараад толгой хаана ч хамгийн чухал, урлаг соёл, гоо сайхны чиглэлээр ажилладаг хүмүүс бүр илүү толгой сайтай байх хэрэгтэй юм даа гэсэн бодол маань улам лавширлаа.

Зогсолт бүхэн учиртай...

Өмнө нь төгөлдөр хуурын багш найзаасаа төгөлдөр хуурч болох хүүхдэд хамгийн чухал нь толгой байдаг, толгой сайтай, тоондоо сайн бол багш нар дуртай авдаг гэсэн юм сонсож байсан. Жүжиг, бүжгийн бэлтгэл дээр ч толгой муутай нь бүтэлгүйтэж загнууладгийг биеэр үзсэн байв.

Тамирчин хүнтэй ярилцаж байхдаа ч техник сэтгэлгээ, мөн асуудлыг хүлээн авах, хариу үйлдэл үзүүлэх гэхчлэн хурдан сэтгэх ур чадвар нь гайхалтай хөгжсөн гэдгийг нь анзаарч байсан. Тэгэхээр хэн толгой сайтай нь л алдаршдаг, амжилтанд хүрдэг байх нь.

Сайхны өмнө харц буруугүй ээ гэж, гэхдээ сайхан харгадах амар биш ээ

Cat walk буюу манайхны хэлдгээр "Мисс алхаа" сурах гэсэн охидууд шууд л толгойгоороо ялгарч байна лээ.

Хичнээн хөөрхөн, бие хаа сайтай байгаад толгой нь хүрэхгүй ахин дахин бүтэлгүйтээд байгаа нэгэн байхад хэний ч анзаарахгүй том нүдний шилтэй, үсээ сүлжсэн хацар нь сайртай царай муутай бор охин толгой сайтай байгаагаараа миний нүдэнд онцгой өртсөөн.

Учир юу гэвээс тэр мисс алхаа нь зүгээр нэг эрхэмсэг алхах биш тооцоотойгоор алхдагт л байгаа юм. 

Тайзны хэмжээнээс хамаарч эргэлт хооронд 6, 8 алхана 2 удаа эргэлт хийгээд буцахдаа 10 алхана, зогсолтын хугацаа 2 хором буюу дотроо 2 тоолно, хайч үүсгэхэд эхний 2 хос 14 дараагийнх 12 тэгээд 10 гэхчлэн тоолж алхаад хамгийн сүүлд бүтэн тойрог хийгээд эхний эгнээнд байсан хос хамгийн ард очсон байх ёстой гэхчлэн хэдийгээр анхан шатны мэдлэг олгох сургалт байсан ч дан тоо цээжилж алхаагаа тооцоолж алхах болохоор хүний толгой сайн муу нь дорхноо мэдэгдэж байна лээ.

Ингэж тоолох завсар мэдээж гоо сайхан инээмсгэлэлээ хадгалж, гэдсээ татна, мөрөө тэнийлгэнэ, гараа савчих, тохой нугалах хүртэл учиртай, хажуугаар нь эрхэмсэг ялдам байдлаар үзэгчидэд өөрийгөө харуулна, хувцас хунартаа хяналт тавина гэхчлэн хар мянган юм байгаа хэхэ.   

Үзэгчид усны хувцастай, эсвэл өнгө өнгийн даашинзтай үзэсгэлэн гуа охидууд хөгжмийн аянд сэвэлзтэл алхаж гарч ирээд хэд эргэлдээд буцаж орж, дахин хэд гурваараа эсвэл бөөнөөрөө гарч ирэхэд гоё сайхныг нь шагшин магтахаас бус энэ бүхний цаадах тооцоог нь бүгд адилхан тоотой алхаж  зогсож, эргэж өөр өөрийн оноосон байранд зогсож байгааг төдийлөн анзаардаггүй байх аа.

Зүгээр нэг тайзан дээр зогсож буй мэт боловч үүний
цаана нөр их хөдөлмөр, бэлтгэл бий...

1 цаг орчмын хичээлийн дараа охид маань шал өөр болсон. Алхаа гишгээ хөлийн тавилт, эргэлт гэхчлэн эмэгтэй хүн мэдэж байхад илүүдэхгүй юмыг сураад зогсохгүй нэгэн жигдээр үзүүлбэр болгон үзүүлж чадаад тарсан шүү. Дашрамд би хичээл заагаагүй шүү, би өөрөө ч алхаагүй хэхэ.