Сонирхол

Эмэгтэй хүмүүс ихэнхидээ өөр хоорондоо төстэйдүү эрэгтэй хүнд татагддаг байх. Харин миний сонирхлыг татаж байсан хүмүүс хоорондоо огт төсгүй юм шиг ээ. За тэгээд намайг ямархуу эр хүнд дуртай байсныг мэдмээр бол наашаа сууцгаа. 

За энэ бол Оросын чөлөөт бөхийн хүнд жингийн домогт аваргуудын нэг А.Иваницкий. Багадаа аавынхаа цуглуулсан номууд дундаас энэ хүний  намтрын "Шийдэх даваа" гэсэн номыг нь олж уншаад ёстой салахгүй дурласан хүн дээ. Гэхдээ хүнд нь биш номонд нь хэхэ. Тэр номонд байсан зургууд нь их бүдэгхэн байсан болохоор гол баатрыгаа ямархуу төрхтэй хүн байсныг сайн тогтоож чадаагүй ч жинхэнэ сайхан эр хүний шинж бүхнийг агуулсан хүн байна гэсэн бодол толгойд бат шингэсэн байсан. Саяхнаас зургийг нь хайж олж үзээд үнэхээр сайхан эр байжээ гэж боддог болсон. Миний хүндэлж явдаг эр хүн дээ.

За дараагийх нь энэ. Дүрсгүй шар Мээдээ хэхэ. Өмнөх хүнээс  тэс өөр байгаа биз? Миний ид шилжилтийн насанд Камертон, Сараа Мараа нь жинхэнэ од болж байлаа штэ. Юун наадам  , юун цагаан сар хэхэ. Сэрүүлэг, Дээдсийн хүрээлэн мэтийн сонин нь эд нарыг л бичдэг байсан. Тэр одууд дундаас гадаад төрх нь хамгийн их таалагддаг нь энэ сөөсгөр шар. Гэхдээ дурласан, шохоорхсон биш зүгээр фен нь гэсэн л үг.

Одоо бол халзраад надтайгаа адил хөгшрөөд хажуугаар гарсан ч тоож харахааргүй болсон байхаа хэхэ.

Энэ хүнийг хараад таньж байна уу? Цагтаа цуутай од байсан Оросын Пуужин Павел Буре. Энийг олж харах гэж хоккей үзсээр байгаад хоккейд гүймөн их дуртай болж байж билээ. Инээх нь яагаад ч юм Сумъяабазар аваргатай их төстэй санагддаг байсийм. Ингэхэд би Орос эрчүүдэд нугасгүй болох гээд байна шүү хэхэ. Гэхдээ зүгээр таалагддаг л байсан гэж байгаа...

90-д оны сүүлээр байхаа манай суманд нэг хэсэг Хятад, Хонгконгийн телевизийн суваг гаргадаг болсон. Тэр үед муу хар цагаан зурагтан дотроо үсэрч орох нь холгүй Хятдын кинонуудыг үздэг байж билээ. Тэр үеэс л энэ жүжигчний тоглосон гоё гоё кинонуудыг үзээд өвөрмөц дүр төрх нь их таалагддаг болсон байсан. Хоёр эхнэртэй сэргэлэн залуугаас эхлээд цуцашгүй тулалдаанч хөзрийн хаан гээд нууцлаг хирнээ золбоолог, нэг тийм хөдөлгөөнтэй сэргэлэн дүрүүд бүтээсэн сайн жүжигчин шүү. Чон Юн Фат.

Дахиад л кино жүжигчин. Гэхдээ урд хөршийн биш хойд хөршийн теле сувгаар танилцсан хүн. Kyle MacLachlan буюу Agent Cooper. Twin Peaks  гээд гоё нууцлаг сериал гардаг байсын. Гол дүрийн хүүхнүүд нь жигтэйхэн хээнцэр, ярих, хөдлөх, тамиха татах, инээх бүр үнсэлцэх нь хүртэл тэр чигтээ урлаг. Харин энэ залуугийн эрүү л надад ёстой таалагддаг. Хамгийн сүүлд Show girls киног нь үзсэн тэрнээс бусад киног нь үзээгүй юм уу эсвэл анзаархаа больчихсон юм уу бүү мэд.

За тэгээд цааш бичээд байвал зөндөө урт жагсаалт болох гээд байна. Ерөнхийдөө харж байхад би  бусад охид шиг нүд хөмсөг энээ тэрээ гэж хардаггүй харин уруул, эрүү гээд нүднээс нь доохнуур харж, дөрвөлжиндүү эрүү, өвөрмөц уруултай бол надад таалагддаг шиг байна хэхэхэ

Харин одоо бол нэг иймэрхүү залуус таалагддаг болсон шүү.