Нохой жил чи яагаад иймийм???

Нохой жил арай л их адал явдалтай эхэлж байна даа. Энэ талаар ярихад маш олон юмыг алгасах хэрэг гарах нь, зарим нэг байгууллага, цаашлаад хувь хүний нэр хүндэд халдах болохоор хэхэ.

Хал балгүй өөрийнхөө тухай ярихад, бурхан минь миний харилцаа холбоо юу болж орхив оо. Чухал чухал захидалуудаа Спам фолдероосоо олдог болоод байна. Урд өмнө нь огт ингэж байгаагүй харин нохой жил гармагц л бараг бүх и-мэйлийнхээ спамыг тогтмол шалгах хэрэгтэй болж эхэллээ.

Юу л даа, санамсаргүй л эхлэсэн юм. Гэнэт л за ажлуудаа хийсэн үү, нөгөө бэлэн болсон матералуудаа өнөө шөнөдөө багатаагаад авъя гэнгүүт юу билээ гэж хагас манарч нтр. Тэгээд ажлын даалгаварууд мэйлээр явуулсан юм уу гэж асуучихаад гэнэт санаад спам руугаа ортол юу вэ, аль 10 хоногийн өмнө ирүүлсэн 3 зиплэгдсэн файл дурайж байх нь тэр.

Тэгээд яахавдээ шаварт унасан шарын эзэн хүчтэй, шөнөжин сууж байж нөгөө их ажлынхаа ард гарлаа. Ёххх бурхан минь. Лавтай 3 насаар хөгшрөв бололтой.

Тэнд бас хүнд явуулах ёстой сертификат татаж авах линк нээгдснийг мэдэгдсэн мэдэгдэл ирсэнийг бараг хагас сар би гуай мэдээгүй хэвтэж байж. Цаад хүн намайг энэ ч ажлаа хийлгээд таг боллоо найдлагагүй гар байнаа гэж бодсон байх даа. Аа бас хувийн чанартай чухал биш мэйлүүдийг яриад яахав. 

Тэгсэн яасан байх уу, сая өөр нэг хаяг руугаа ортол бас миний заргалдаж бичсэн захианы хариу аль хэдийнээ ирчихсэн дурайж байх нь тэр. (ажлын шаардлагаар ч гэх үү дээ хэд хэдэн хаяг зэрэг ашиглах хэрэг гардаг юм) Одоо өнгөрсөн борооны хойноос цув нөмрөв, ямар ч гэсэн хий хоосон заргалдаагүй гэдгээ мэдэгдэхээр файлуудаа цуглуулж шидчихээд байж байна.

Энэ мэтчилэн хөл толгой нь олдохгүй юм болоод байх юм. Яаж л нэг ард нь гарна даа. Гэхдээ хөөрхөн нь бүгд сайнаар төгсөөд байгаа хэхэ.

Гар утас маань хүртэл гацаад, заримдаа олигтой sync хийж чадахгүй мэйлүүд нээгдэхгүй ч байх шиг. Бүр байгаад dropbox дотор байсан бүх урдын хурлын тэмдэглэлүүд, хавсаргасан материалууд бүр англи, араб, франц хэл дээр давхар орчуулуулсан миний хичээлүүд бүгд мэдэгдэлгүй устаж эдр. Хуулж аваагүй хүн чинь тэгээд нөөц хоосон гар мухар хоцорвоо хөөрхий. 

Ээ энэ тийн унжлагат нохой жил юуг л унжуулах гээд байгаа бол доо. Энд тэнд замбараагүй үсэрч тарж орхисон ажлаа цуглуулж авах гэж давхисаар хэл унжих гээд байна уу яана хэхэ.

За за засал хийлгэе, засал хийлгэе хохо. Хэрэг болдог л байгаа даа. /хэлээ гаргав/