Аз жаргалууд

Манай гэрийн "жижиг" өдөрт зуун наян чавганцын ажилтай. Эгчийн бага охин л доо.

Хэлд хараахан ороогүй ч хүссэн юмаа дохио зангаа ашиглаад хөөрхөөн илэрхийлчихдэг. Унтах болохоороо уруулаа цорвойлгож өрөөсөн мөрөндөө толгойгоо наагаад л "Гох гох" гээд ээжийгээ чирнэ.

Үгэнд нь орохгүй бол хоёр гараараа хувцаснаас нь зуураад бараг л өргөөд явчихна. Өдрийн цагаар ээжийгээ гаргахгүй ээ. Эгч заримдаа ажилдаа явж чадахгүй бухимднаа. Гэхдээ мань жижиг хүнийг хараад хамаг юмаа мартана л даа. 

Тоглоомоо дүүргэсэн цаасан хайрцганд орж суучихаад гарч чадахгүй уйлж, бага эгч нь давхиж очиж салгаж авснаар сүүлийн адал явдал нь өндөрлөх жишээний.

2 ой хүрээгүй ч памперснаасаа салсан. Шөнө шээдэггүй, өмдөндөө ч шээдэггүй гэж байгаа. Горшоок гээд жижиг хүүхэд суудаг сандлан горшоокийг ноднин ээж нь авч өгөхөд би дотроо бас нэг хэрэглэдэггүй юмтай болох нь л дээ гэж бодсон байх шүү бараг. Горшооктой болсон эхний өдрөө мань жижиг дотор нь боов шоовхон хийж хадгалаад баясаад байсан одоо бол жинхэн утгаар нь хэрэглэж чадаж байгаа.

Хэний ч туслалцаагүйгээр гүйж очиж тагийг нь сөхөөд өөрөө шээнэ, заримдаа бүр баана. Тэгээд тагаа өөрөө хаана. Сүрхий, сүрхий.

Надад бас хөөрхөн хөөрхөн хов зөөнө. Өчигдөр учиргүй уруул амаа өмөлзүүлж өрөвдөм царай гаргаад хуруугаа үмхээд ахин дахин ам руугаа юм шидэж байгаа болоод байсан ээж нь учрыг нь хэлсэн.  Яасан гэсэн аавых нь толгой өвдөөд эм ууж л дээ, тэрийг надад ховлоод учиргүй ёо ёо ёо ёо гээд эм ууж байгааг үзүүлээд байж. 

Жижигхэн хүүхэд өсөж томрох ч хурдан юм. Гараад ирэхээрээ амархан өсдөг юмаа гээд эгч нар яриад байдаг. Өвчингүй зовлонгүй зөнгөөрөө өсчихвөл эцэг эхийх нь жаргал тэр.

Энэ жижиг хүн манай 1-р бацаан гэсэн үг. Нийт 4 бацааны эхнийх нь. Юу гэвээс төрсөн ах дүүсийн хүүхдүүд томорч, хамгийн жижигүүд нь 10 нас хүрсэн хойно өнгөрсөн 2 жилд дараалаад л хүүхэдтэй болцгоосон. Надаас бусад нь сүүлийн хоёр жил жижиг хүүхэдтэй болов шүүдээ. Энэ жижиг анх гараад араасааа өч төчнөөн бацкаан дагуулсан булган сүүлтэй эрхэм байгаан.

Ходоод нь хоолтой, дулаан, гэрт ээж нь байвал бацаануудад ер нь өөр юм хэрэггүй бололтой. Инээд алдаад л хөөрхөн хөөрхөн тожир тожир гээд байх нь тэр. Ядаж байхад хөл нь майжиг, дээр нь хурдан хөдөлгөөнтэй гэдэг жигтэйхэн. Ёлтойсон хоёр хөөрхөн хар нүд гаргачихаад л өдөржин уур уцаар, элдвийн стресс зэргийг эмчлээд гүйгээд байх нь тэр.

Цаанаас бусад бацаанууд нэмж цуглавал бүр цэцэрлэг болох нь тодорхой. Гэхдээ 2 бацаан нь гадаадад байгаа болохоор одоогоор бүрэн бүрэлдэхүүнээрээ цуглаж үзээгүй л байна. Монголд байгаа 2 жижиг нийлэхээрээ бие биенээ шоглоно, тоглоно, бас дундаа 1 мөөм хүртэл хөхнө. Ер нь л манай танай гэх юмгүй болчихдог юм.

Бацаан, жижгүүдийн тухай ер нь ховорхон дурссан байх шүү. Яахав нэг бичээдхэе хэхэ.